CONCELLO
Os centros culturais de Trabanca Badiña, Bamio e Rubiáns tamén disporán de calefacción de biomasa O Concello de Vilagarcía ten previsto desenvolver este ano unha nova fase do Plan municipal de aforro e eficiencia enerxética que afectará a tres centros socio culturais do municipio. A intención do goberno local é instalar caldeiras de biomasa nos centros socioculturais de Trabanca Badiña, Bamio e Rubiáns. A actuación precisa dun investimento total de 70.356 euros para cuxo financiamento a Xunta Local de Goberno acordou concorrer as axudas que concede o Instituto Enerxético de Galicia para actuacións de aforro e eficiencia enerxética en instalación municipais.
01.03.2018.- As actuacións previstas nos tres centros socioculturais consisten en substituír o sistema de radiadores eléctricos que se está a usar ata o momento por unha instalación completa de calefacción a base da combustión de pellets. Para isto instalaranse a caldeira de biomasa, os calefactores e o resto dos equipos precisos. Segundo os estudos de necesidades levados a cabo previamente, para garantir os niveis de confort de temperatura en función do tamaño dos centros, adquiriranse caldeiras de 64 kw de potencia para os centros de Rubiáns e Trabanca Badiña e unha de 32 para o de Bamio.
Coa instalación de caldeiras de biomasa, o Concello aforrará unha importante suma económica en concepto de consumo de enerxía eléctrica, máis cara que o pellets. Esta non será a primeira actuación deste tipo que levará a cabo o Concello nos centros socioculturais do municipio, xa que o ano pasado instaláronse estufas de biomasa nos de Fontecarmoa, Galáns e Faxilde. Aínda que tamén eran caldeiras de biomasa, o sistema de propagación da calor nese caso é por aire, mentres que nas tres que van instalar este exercicio, a calor distribuirase pola instalación a través de calefactores.
Tamén a Escola Municipal de Música e a Biblioteca de Vilagarcía contan dende hai algo máis de dous anos con caldeiras de pellets, medida que permitiu prescindir do uso de gasóleo, tamén máis caro que o pellets.