FESTAS
O Ágora Vermú regresa este domingo á Baldosa cos ritmos flamencos de Tacón Gitano A terceira edición do “Ágora Vermú”, o ciclo de concertos matutinos ao aire libre organizado pola Concellería de Cultura de Vilagarcía, ponse a andar este domingo, 20 de maio, coa actuación de Tacón Gitano. A formación animará á hora do aperitivo con ritmos e baile flamenco. O concerto será na Rúa Baldosa a partir das 13:30 horas.
19.05.2018.- Tacón Gitano é flamenco, pero non é un flamenco calquera, é a voz dun pobo, o pobo xitano, que expresa coma ninguén seus sentimentos a través da súa música e o seu baile. A formación inclúe no seu repertorio temas moi populares de recoñecidos artistas e grupos como Niña Pastori, Ketama , José el Francés ou Camarón; e a súa actuación inclúe a intervención dun xoven “bailaor” que arrancarase por soleares e bulerías.
Ágora Vermú é un programa ideado como elemento dinamizador e para achegar distintos estilos de música e actividades lúdicas a público de todas as idades, é dicir, a todas aquelas persoas, familias ou grupos de amigos que se topen polas rúas un domingo a mediodía. Seguindo a tónica marcada dende a súa creación, o ciclo inclúe estilos musicais diversos e ten un criterio deslocalizar, polo que os concertos non se limitarán ao centra da cidade, senón que se achega a outras zonas. Este ano, ademais da céntrica Rúa Baldosa e o Xardín de Ravella, tamén haberá actuacións no Parque de Dona Cocha en Vilaxoán, na Praza da Liberdade de Carril e no Piñeiriño.
Ao primeiro concerto deste domingo, seguiranlle os de Terbutalina, A Gramola, The Dawlins e Funkles, todos eles os domingos á hora do vermú.