OBRAS E SERVIZOS
Obras desenvolve unha nova campaña de bacheo polo rueiro municipal O departamento de Obras e Servizos do Concello iniciou no mes de maio unha nova campaña de bacheo do rueiro municipal. Este tipo de traballos lévase a cabo de forma periódica cada primavera para tapar as fochas que foran aparecendo nas estradas e camiños ao longo do ano e especialmente durante o inverno. Nas últimas semanas, aproveitando o tempo seco necesario para acometer este tipo de traballos, xa se actuou en diversos puntos de Castroagudín, Trabanca Sardiñeira, Cea, Rubiáns e Trabanca Badiña. A campaña continúa esta semana.
28.05.2018.- Aparte de acudir a arranxar as fochas das que xa se ten constancia, os operarios municipais van repasando o rueiro municipal para detectar outros puntos onde é preciso actuar. Esta semana está previsto realizar novas labores na Torre (onde xa se pasou hai uns días) Guillán, Concepción Arenal e a avenida Juan Carlos I (á altura dos Xardíns Doutor Fleming). En función da rapidez coa que avancen os traballos, o plan é trasladar o equipo de bacheo cara a zona sur do municipio para continuar mellorando a rede viaria por Santa Mariña, Renza, Zamar, Faxilde, Aralde e Eiviño.
A campaña de bacheo non rematará aí, posto que se farán novos repasos polo rueiro para actuar en puntos que se puideran ter quedado atrás.