XUVENTUDE
Xuventude abre o prazo para anotarse no campamento tecnolóxico do Tecnoverán A Concellería de Xuventude organiza unha nova edición do Tecnoverán, unha proposta formativa na que 20 mozos e mozas poderán adquirir coñecementos sobre as novas tecnoloxías. Realidade virtual e aumentada, programación, deseño de apps e videoxogos, uso de impresoras 3D son os temas que se abordarán de forma práctica no obradoiro que se desenvolverá do 2 ao 6 de xullo en horario de mañá (de 9 a 13.30 horas) no Centro de Formación de Matosinhos. A participación é gratuíta e a preinscrición xa poderá realizarse do 1 ao 15 de xuño a través do enlace: https://goo.gl/forms/KFoUylwuHIT4zUik1
31.05.2018.- O departamento que dirixe Sonia Outón organiza o Tecnoverán co obxectivo de seguir incidindo na formacións da mocidade, tanto a efectos profesionais e laborais, como simplemente de estar ao día nas innovacións tecnolóxicas que están a disposición de todo o mundo e que son esenciais para numerosas facetas da nosa vida cotiá.
O colectivo O Núcleo será o encargado de impartir esta experiencia educativa inmersiva a través dunha metodoloxía lúdica e práctica que se artellará a modo dun xogo no que os alumnos, utilizando as tecnoloxías, deberán descubrir quen está detrás dunha serie de misteriosos sucesos sucedidos en Vilagarcía. Xogando poderán seguirlle a pista e, de paso, aprenderán a programar, a deseñar apps e videoxogos, a usar as impresoras 3D e a realidade virtual e aumentada.