CONCELLO
O Concello investirá outros 60.000 euros en dotar de caldeiras de biomasa a outros tres centros culturais O Concello de Vilagarcía continúa adiante coa súa aposta polas enerxías renovables. Grazas a un convenio co Instituto Galego de Enerxía (Inega), nas vindeiras semanas investirá outros sesenta mil euros na instalación de caldeiras de biomasa nos centros culturais de Trabanca Badiña, Rubiáns e Bamio. Deste xeito, substituirase o actual sistema de calefacción eléctrica por outro alimentado por pellets. Cabe subliñar que nalgúns da vintena de centros socioculturais a factura eléctrica chegou ata os 800 euros, cifra que agora se verá drasticamente reducida.
03.07.2018. Segundo os estudos de necesidades levados a cabo previamente, para garantir os niveis de confort de temperatura en función do tamaño dos centros, adquiriranse caldeiras de 64 kw de potencia para os centros de Rubiáns e Trabanca Badiña e unha de 32 para o de Bamio. A instalación inclúe as caldeiras e os calefactores.
O investimento está incluído nun plan que pretende levar as enerxías renovables a todos os centros. Nos casos anteriores –Galáns, Fontecarmoa e Faxilde-, aínda que se instalaron caldeiras de biomasa, o sistema de propagación era por aire. Agora, nesta nova quenda, a calor distribuirase mediante calefactores.
O plan iniciouse hai xa dous anos na Escola Municipal de Música, á que seguiu a Biblioteca Xeral, na rúa Rey Daviña. En ambos casos, non foi a electricidade, senón o gasóleo, o substituído en favor da biomasa, co conseguinte aforro en dous centros con tanto uso por parte dos vilagarciáns.