PATRIMONIO
A instalación do reloxo culmina a recuperación do obelisco no novo emprazamento do Cavadelo O obelisco lucirá completo a partir desta fin de semana no seu novo emprazamento do Cavadelo. A recuperación do monolito despois de tres anos rematouse esta mañá coa colocación do reloxo de catro esferas na parte superior do pináculo. Operarios municipais e un reloxeiro encargáronse das labores.
13.07. 2018.- Os traballos realizados esta mañá rematan a parte de montaxe da estrutura de pedra propiamente dita. Nos vindeiros días, procederase á ornamentación da rotonda con elementos florais e a instalación dos focos que iluminarán o monolito durante a noite para realzar a súa presenza.
O Concello de Vilagarcía recuperará este elemento do patrimonio local recente emprazándoo na rotonda do Cavadelo, de feito que presida o eixo onde se cruzan as rúas Conde Vallellano e Avenida da Mariña e sexa perfectamente visible dende puntos como a Praza de Galicia ou a Alameda.
Por outro lado, a cuncha da escultura Perla de Arousa que estaba anteriormente na rotonda trasladouse á illeta das inmediacións, onde xa está reinstalada e mellorada, posto que a cuncha recuperou a “perla” que daba nome ao conxunto e que se iluminará pola noite.