XUVENTUDE
Os participantes no obradoiros infantís de igualdade irán a mariscar a Carril e a aprender a tradición oleira en Bamio A Área de Igualdade do Concello ampriou ata o 27 de xullo o prazo de inscrición nos Obradoiros infantís de Cociña, ocio e tempo libre organizados mara sensibilizar e educar aos cativos e cativas dende unha perspectiva de igualdade de xénero. Ademais das clases de cociña e tarefas domésticas, os obradoiros enriquécense este ano con visitas guiadas para coñecer labores profesionais que tradicionalmente se asociaban cun só xénero. Os participantes nos obradoiros poderán coñecer o traballo das mariscadoras de a pé da man da asociación AmarCarril e tamén a tradición oleira e o Roteiro do Barro a través da Asociación de Mulleres de Bamio, impulsoras da recuperación desta actividade tradicional na parroquia.
17.07.2018.- Con estas dúas visitas presentamos aos nenos e ás nenas unha serie de valores e experiencias diferentes das que se asignaron tradicionalmente á masculinidade e á feminidade, o que lles axudará ao desenvolvemento da súa personalidade como futuros homes baixo a premisa de que todos adquiren as mesmas potencialidades e responsabilidades.
Ademais, con este tipo de actividades tamén se pretende proporcionar a alumnado un maior coñecemento das aportacións das mulleres, e concretamente as das súa contorna, á vida económica, cultural, social…, o que lles axudará a ir formando a súa identidade dende a perspectiva do xénero e da corresponsabilidade.
Os obradoiros de cociña ocio e tempo libre están dirixidos a nenos e nenas nados entre o ano 2009 e o 2012 (ambos incluídos).A participación é de balde e ofértanse 50 prazas a distribuír entre os cinco centros socioculturais nos que se impartirán as sesións. Desenvolverase un día por semana en cada un deles, entre o 30 de xullo e 10 de setembro. Deste xeito, os luns será no centro cultural de San Roque, os martes no de Cornazo, os mércores en Trabanca Badiña, os xoves no centro cultura O Piñeiriño e os venres no centro cultural Gato Negro de Carril. O centro cultural onde realizar o curso elixirao o solicitante no momento de realizar a inscrición, marcándose unha orde de preferencia.
O horario será de 09. 30 a 13.30 horas, aínda que para favorecer a conciliación das familias, poderase flexibilizar a entrada en media hora ata as 10.00 e a saída pode realizarse a partir das 13.00 horas. A inscrición debe realizarse nas dependencias da Área de Igualdade, onde se poderá recoller a folla de solicitude.
A Área de Igualdade leva an os organizando estes obradoiros a través do CIM e no marco do programa de sensibilización en Igualdade e de acordo co III Plan de Igualdade do Concello de Vilagarcía, no que s recolle a realización dunha “Campaña de verán para as familias” dentro da área III Cambio de valores e modelos para a Igualdade, que ten como obxectivo xeral Contribuír á superación de estereotipos, valores e actitudes que sustentan a desigualdades de xénero. As actividades contan co financiamento da Deputación Provincial a cargo do Plan Concellos 2018.