VILAGARCIA DE AROUSA

OBRAS E SERVIZOS
Adxudicada a primeira fase da Renovación Urbana do entorno de Matosinhos a Excavaciones Ivanca
A Xunta Local de Goberno aprobou na reunión do luns adxudicar á Excavaciones Ivanca a primeira fase do proxecto de Renovación urbana do Entorno de Matosinhos. O contrato para o cal presentaron ofertas 31 empresas adxudicouse por importe de 219.685 euros o que supuxo un aforro de 46.188 euros sobre o prezo de licitación. Esta actuación permitirá mellorar a accesibilidade, os servizos básicos e a estética dunha zona moi transitada ao atoparse nela catro centros educativos, e na que se levaban décadas sen actuar. Esta parte dos proxecto financiarase integramente con fondos municipais.

17.08.2018.- Nesta primeira fase do proxecto os traballos centraranse na zona máis próxima á escola Infantil Municipal e ao fronte da Avenida Doutor Tourón. O principal obxectivo das obras é garantir a accesibilidade e protexer aos peóns. Para conseguilo, o acceso dende Doutor Tourón ata a Escola Infantil converterase nun paseo peonil. As actuais beirarrúas, que teñen pouco máis de medio metro de ancho e moito alto, desaparecerán para quedar todo o paseo ao mesmo nivel e cun firme regular, para o cal se utilizará o formigón tratado como principal materia prima.

Tamén se actuará nos pasos que comunican a Avenida Matosinhos con esta zona. Para salvar a importante diferenza de cota actual, construiranse ramplas de pendente axeitada a fin de permitir un cómodo paso de persoas con problemas de mobilidade ou carros de bebés. Na zona de escaleiras do inicio da Avenida Matosinhos tamén se construirán ramplas e se mellorarán as beirarrúas na área afectada de Doutor Tourón.

O proxecto contempla igualmente unha nova ordenación do tráfico, facilitando que os coches poidan seguir chegando ata as portas da gardería, pero cunha mellor circulación e facendo posible a convivencia cos peóns. Como vén sendo habitual en todo este tipo de obras, o Concello aproveitará tamén para renovar as redes de auga e saneamento, o que na zona de Matosinhos ten especial importancia dada a tendencia a sufrir asolagamentos.

Unha vez adxudicadas as obras, agora a empresa deberá presentar toda a documentación necesaria para proceder á sinatura do contrato, tras o cal, concretarase a data de inicio dos traballos. Unha vez rematada esta fase, completarase o proxecto cunha nova actuación no resto da contorna do Parque de Matosinhos que se financiará cos fondos europeos do Edusi.