VILAGARCIA DE AROUSA

CONCELLO
A Xunta Local de Goberno adxudica o luns a redacción do proxecto do Carril bici do paseo da Concha Compostela
A Xunta Local de Goberno aprobará na reunión do vindeiro luns a adxudicación dos traballos de redacción do anteproxecto e o proxecto básico de execución do carril bici do paseo marítimo da Concha-Compostela. Tras a documentación remitida anteriormente a Costas do Estado, o organismo estatal solicita o anteproxecto para completar o procedemento de autorización da concesión administrativa dos terreos polos que discorrerá a infraestrutura que permitirá dar continuidade ao carril bici que remata ao inicio da Concha.

24.08.2018.- A prolongación da pista para bicicletas polo paseo marítimo é unha vella demanda dos vilagarciáns que o executivo que preside Alberto Varela xestionou con Costas ata conseguir o beneplácito do organismo estatal. Dado que Costas asumiu o custe da reforma do paseo, o Concello accedeu a financiar a redacción do proxecto e construción do carril bici. Previamente houbo que iniciar os trámites de ocupación da franxa de terreo de dominio público marítimo costeiro que é titularidade do organismo estatal, proceso que rematará coa remisión do anteproxecto.

A redacción do anteproxecto e do proxecto básico de execución adxudicarase por importe de 15.000 euros á empresa AM2 Arquitectos. O Concello deberá esperar a que Costas notifique a autorización da concesión para sacar a licitación a obra da infraestrutura ciclo turista. A idea é que o carril descorra pola zona de area pegada ao paseo e que teña un ancho de entre 2,5 e 3 metros, de forma que permita marcar os dous sentidos da circulación. O ancho definitivo e a lonxitude da infraestrutura dependerá do permiso que conceda Costas xa que, como se sabe, o areal non ten o mesmo ancho en toda a súa extensión. Tal como se dixera no seu momento, a previsión era acometer a obra do carril bici despois da segunda fase da remodelación do paseo.

A maiores desto, e dado que o Ministerio comprometeuse a iniciar despois do verán a segunda fase da reforma do paseo marítimo, no tramo comprendido entre o balneario da Compostela e as inmediacións do Hotel Carril, o alcalde ten a intención de desprazarse en setembro a Madrid para abordar cos responsables de Costas a execución desta obra e tamén intentar acelerar o procedemento da concesión dos terreos do carril bici.