VILAGARCIA DE AROUSA

MULLER
Concello e Por Todas asinan un convenio para complementar a atención a vítimas de violencia machista
O Concello de Vilagarcía e a Asociación Por Todas asinaron un convenio de colaboración que ten por obxectivo complementar a atención a vítimas de violencia machista que presta a administración municipal dende o Centro de Información á Muller. Mediante este acordo, a asociación de mulleres será quen preste a atención primeira e quen acompañe ás vítimas de malos tratos cuxos casos se produzan fora do horario habitual de atención dos servizos municipais.

28.09.2018.- O alcalde, Alberto Varela, e a presidenta da asociación Eylin Colmenares, asinaron este mediodía convenio mediante o cal o Concello de Vilagarcía contribuirá cunha achega económica de 2.000 euros ao financiamento dos gastos que reporte a atención ás vítimas durante as fins de semana ou festivos, ademais de ceder o uso da antiga escola unitaria de Bamio como sede e centro de operacións de Por Todas.

A concelleira de Igualdade, Tania García, explicou que a asociación leva colaborando co Concello dende os seus inicios, tanto participando en todos os actos e actividades que se organizan a través do CIM como realizando este apoio no acompañamento a vítimas. “Dende hai un tempo xa viñan realizando ese acompañamento en primeira instancia a mulleres que sufrían unha agresión un sábado ou domingo ou polas noites. A Policía xa avisaba á asociación cando tiñan un caso fora do horario dos servizos municipais, e AxTodas xa se encargaba de desprazar a alguén para acompañar a esa vítima a facer trámites de denuncia, aos servizos médicos, ao xulgado ou simplemente a acompañaban..xa en función das necesidades da mesma afectada”.

Varela engadiu que “as administración non podemos chegar a todo, e por iso precisamos complementarnos deste xeito. Por Todas está facendo unha labor moi boa e necesaria que cremos que temos que apoiar con esta aportación económica e facilitándolles un local”.

Pola súa banda, a presidenta do colectivo indicou que os cartos destinaranse tanto a pagar custes de desprazamentos para a atención e acompañamento de vítimas como para a realización de cursos de formación das propias asociadas, “porque cremos que é esencial ter unha formación mínima en cuestión de xénero para saber atender o mellor posible ás vítimas de malos tratos e aos seus fillos”. A disposición das dependencias da antiga Escola Unitaria é para o colectivo “un paso moi importante porque nos permitirá facer aí os cursos, reunirnos e organizar a nosa actividade”.