CONCELLO
O Concello redacta a proposta para ensanchar a beirarrúa do IES Castro Alobre Os servizos técnicos municipais están elaborando xa a proposta de ensanche da bairarrúa do IES Castro Alobre que o Concello de Vilagarcía remitirá á Xunta de Galicia co obxecto de que a administración autonómica ceda os terreos necesarios para levar a cabo a demandada actuación. No boceto concretaranse as dimensións de retranqueo do muro do centro educativo que é necesario levar a cabo para que a estreita beirarrúa acade o ancho que se establece na lei de accesibilidade e que garanta a seguridade viaria na transitada Rúa San Roque.
01.11.2018.- A principios deste ano, o Concello de Vilagarcía remitiu á Xunta de Galicia o acordo plenario no que se demandaba á administración autonómica a cesión dunha franxa de terreos da zona de aparcamento do instituto Castro Alobre para poder ampliar a beirarrúa que discorre en paralelo á fachada do centro educativo que apenas supera o medio metro de ancho. A Corporación argumentaba a petición en motivos de seguridade viaria, posto que dada a estreitez da beirarrúa imposibilita que pasen dúas persoas á vez, polo que un peón ten que baixar a calzada cando se cruza con outro ou con alguén que leve un carro de bebé ou da compra. A maiores, este tramo é moi utilizado tanto polos alumnos do centro educativo, como polos numerosos usuarios do centro de saúde de San Roque que se atopa a continuación, especialmente por persoas maiores e con problemas de mobilidade.
A petición enviada no mes de xaneiro ás consellerías de Educación e de Facenda tivo resposta a mediados de outubro a través dun escrito da Secretaría Xeral Técnica de Patrimonio, da Consellería de Facenda. Nel solicítase ao Concello a documentación técnica na que se concreten os terreos obxecto de cesión para poder valorar a proposta e a incidencia da mesma no centro educativo.
Dado que a resposta á petición do Concello tardou nove meses en chegar, o Concello pretende mandar canto antes o documento técnico para non demorar moito máis a necesaria actuación.