MEDIO AMBIENTE
A Covacha engrosa a lista das cinco praias de Vilagarcía con augas de calidade Concello de Vilagarcía vén de incrementar a lista das praias municipais que acadan o máximo nivel de calidade das súas augas. Aos xa habituais areais do Campanario (Bamio), Preguntoiro (Vilaxoán), Compostela e Canelas, súmase este ano o da Covacha, en Carril que, segundo a clasificación remitida pola Consellería de Sanidade, tamén logra a cualificación de "excelente". As augas na zona da Concha tamén son perfectamente aptas para o baño, aínda que aproban cun "suficiente", igual que nos últimos anos.
17.11.2018.- O informe anual remitido pola Xunta baséase nas analíticas realizadas pola Dirección Xeral de Saúde Pública ao longo de todo o ano 2018 e é o que estará vixente de cara a tempada de baño de 2019. Segundo estes datos, a evolución rexistrada pola calidade das augas das zonas de baño do municipio foi positiva. En 2016 son eran 3 os areais cuxas augas acadaban a excelencia (Preguntoiro, Campanario e Compostela). No 2017 sumouse a este grupo o areal de Canelas (Sobradelo) e agora, en 2018, tamén A Covacha pasa a formar parte da elite de areais municipais.
O obxectivo pois, de cara ao próximo ano será manter o máximo de excelencia nestes cinco areais e tratar de mellorar o da Concha.
O control sanitario levouse a cabo mediante a mostraxe periódica da auga das zonas de baño, realizada polo corpo de farmacéuticos inspectores da Saúde Pública de cada xefatura territorial de Sanidade segundo o calendario preestablecido. A clasificación sanitaria calcúlase seguindo o procedemento e parámetros da Unión Europea.