CULTURA
O teatro sumase a loita contra a violencia de xénero coa representación de “Invisibles” O teatro galego regresa esta fin de semana ao Auditorio para sumarse aos actos conmemorativos do 25N, Día Mundial contra a Violencia de Xénero. Será un día antes, o sábado 24, cando a compañía Redrum Teatro poña en escena “Invisibles”, a obra baseada nas historias reais de mulleres galegas vítimas de malos tratos recollidas no libro homónimo de Montse Fajardo. A representación comeza ás 21.00 horas e a entrada custa 5 euros para o público en xeral e será de balde para xóvenes, persoais maiores e parados que acrediten a súa condición.
19.11.2018.- Marián Bañobre é a directora desta obra protagonizada polas actrices Mela Casal, Sheyla Fariña e Nieves Rodríguez . A pretensión fundamental deste espectáculo é concienciar e sensibilizar ás espectadoras e aos espectadores sobre esta lacra que invade a nosa sociedade. “Invisibles” invita a dúas grandes reflexións: a inexistencia dun perfil típico entre as mulleres que sofren violencia de xénero e a invisibilidade dos agresores fronte á exposición das vítimas ante a sociedade.
Pódese dicir que “Invisibles” é un espectáculo para público adulto pero que tamén cun grande interese para xoves en idade adolescente, xa que é precisamente nese rango de idade no que rematan de formar as súas personalidades e no que comezan as súas primeiras relacións de parella. É o momento no que coñecer este tipo de situación pódelles levar a construír unha relación máis sa e a asentar os límites das súas relacións futuras.
As entradas para a función do sábado pódense adquirir de xeito anticipado (máis custes de xestión) a través de http://www.ticketea.com ou o teléfono 902 044 226. Para obter a entrada de balde será preciso acreditar a condición de beneficiario no control de acceso: Desempregados (tarxeta desemprego), estudantes (carné xoven) e maiores de 65 anos (D.N.I.).