CONCELLO
O Concello acada un acordo con Fenosa para trasladar o transformador situado a carón do lavadoiro de Vilaxoán As negociacións realizadas polo goberno local de Vilagarcía con Fenosa para trasladar o transformador eléctrico situado ao carón do lavadoiro de Vilaxoán acaban de frutificar. O Concello chegou a un acordo coa compañía para que esta renove todo o equipo e acometa o seu traslado aos baixos do edificio da nova escola infantil a cambio de que o Concello financie os custes de man de obra. A actuación suporá unha mellora na seguridade, ao eliminar o transformador da vía pública e substituílo por maquinaria totalmente nova, e tamén dará solución a unha vella demanda dos veciños da zona que se queixaban dos molestos ruídos que xeraba a vella maquinaria.
08.12.2018.- A Xunta Local de Goberno aprobou a semana pasada o proxecto acordado con Fenosa para renovar e trasladar o transformador da Urbanización Miramar, e tamén as liñas de media e baixa tensión ás que vai conectado. Como contrapartida, o Concello terá que asumir os 35.000 euros nos que se valora a man de obra cualificada para levar a cabo os traballos e aportar o terreo para a recolocación do transformador. O acordo resulta beneficioso para as dúas partes, dado que a compañía presupostaba en algo máis de 100.000 o custe total da actuación incluída a compra de terreos para o traslado.
Despois de que Fenosa e o Concello deran o visto bo ao proxecto, este debe ser autorizado pola Conselle´ria de Industria da Xunta de Galicia, á que xa se lle remitiu.