CONCELLO
Servizos Sociais traballa a prevención do ciber acoso e o bo uso das TICs co alumnado de Secundaria e as súas familias A Área de Servizos Sociais do Concello de Vilagarcía está desenvolvendo un programa de prevención do ciber acoso e bo uso das TICs co alumnado de Secundaria e as súas familias. A iniciativa xurdiu pola necesidade de abordar a problemática que se está detectando entre a poboación, especialmente a xuvenil, debido á falta de información ou mal uso das novas tecnoloxías das comunicacións. O proxecto elaborado polo departamento que dirixe Tania García financiouse a través da liña 2 do Plan de Obras e Servizos (POS) da Deputación, cun orzamento de 3.974 euros.
18.10.2018.- O proxecto, que están a levar a cabo dende principios de novembro educadores sociais especializados na problemática do ciber acoso, ten como destinatario oo alumnado dos catro centros de Secundaria do municipio e as súas familias. A iniciativa estrutúrase en dúas liñas de traballo diferenciadas: Coas familias e cos adolescentes.
A primeira consistiu en sesións informativas e de traballo cos proxenitores dos alumnos, programadas a través das Anpas, e que se desenvolveron en cada instituto. Nos obradoiros de prevención do ciberaocoso e o bó uso na rede, informouse ás familias das pautas a seguir, tanto para detectar situacións problemáticas, como para establecer estratexias educativas que permitan a aprendizaxe dun bo uso das redes sociais, e as diferentes plataformas dixitais empregadas polos seus fillos e fillas.
A segunda liña de traballo, que está a piques de rematar, céntrase no traballo cos propios alumnos e alumnas, que terán que abordar a problemática do ciber acoso e o uso das TICs reflexionando segundo o aprendido e as súas propias experiencias. Isto serviralles para crear exemplos que se representarán no formato de teatro-foro. Trátase de construír unha peza teatral para abordar a problemática do ciber acoso, construíndo alternativas para dar apoio á vítima e aportar solucións dende o propio entorno.
O teatro foro desenvólvese nesta primeira edición do proxecto a modo experimental nun único centro, o IES Castro Alobre. As representacións comezaron o luns e rematan o xoves.
Obxectivos do proxecto
Con este proxecto de prevención do ciber acoso e bo uso das TICs, os Servizos Sociais de Vilagarcía pretenden contribuír ao uso responsable das novas tecnoloxías da información e da comunicación, neste caso concreto, da poboación xuvenil. Por iso, entre os obxectivos específicos da iniciativa atópanse mellorar o coñecemento das redes sociais on line e a comunicación, fomentar hábitos de utilización responsable das redes, concienciar sobre os posibles riscos e as avantaxes das redes, dotar de ferramentas que permitan minimizar os riscos derivados do abuso ou mal uso, previr situacións de ciber acoso dende a análise da súa xénese ate a pro actividade no apoio á vítima, así como desenvolver actuacións prácticas cun impacto directo na comunidade para previr o ciber acoso.