MEDIO RURAL
O Concello acometerá a mellora e ensanche do camiño rural que discorre entre Perrón e Sentín, na parroquia de Rubiáns O Concello de Vilagarcía ten previsto acometer a mellora e ensanche do camiño que discorre entre os lugares de Perrón e Sentín, na parroquia de Rubiáns. O goberno local xa dispón do proxecto para levar a cabo a obra na que se investirán 135.822 euros. Na última Xunta Local de Goberno aprobouse a actuación e acordouse solicitar á Axencia Galega de Desenvolvemento Rural unha subvención de 47.850 euros. O Concello aportará os 87.972 euros restantes.
28.02.2019.- Esta actuación en Rubiáns enmárcase no plan de mellora da rede viaria rural que está a levar a cabo o Concello. O goberno local decidiu actuar no camiño de Perrón a Sentín debido ao acusado desgaste que presenta o firme, con zonas afundidas e a presenza de numerosas fendas. A actual plataforma ampliarase aproveitando os retranqueos de parcelas levados a cabo nos últimos tempos para axustar as alineacións ao recollido no Plan Xeral de Ordenación Urbana. Este ensanche da vía repercutirá nunha mellora da seguridade viaria para os vehículos e para o tránsito peonil.
Por último, aproveitaranse as obras para dotar ao camiño dunha rede de drenaxe de pluviais. Finalmente se fresará a actual capa de rodadura e se botará unha nova a base dunha mestura bituminosa en quente. Os traballos concluirán coa elevación das caixas de rexistro das redes de servizos existentes.
As obras teñen un prazo de execución de dous meses.