OBRAS E SERVIZOS
Adxudicada a reforma da cuberta da grada de preferente da Lomba A esperada reforma da cuberta da grada de preferente do campo municipal de fútbol de A Lomba, está a un paso de materializarse. A Xunta de Goberno Local acordou na reunión de esta mañá adxudicar a obra á empresa Actividades de Construcción, Efidicación y Viales S.L. por ser a súa oferta a mellor puntuada das 10 que concorreron ao concurso. A actuación adxudicouse por importe de 128.984 euros que se financian con cargo ao Plan Concellos da Deputación e as obras iniciaranse tan pronto como rematen a temporada, de ser o caso, os partidos de ascenso, segundo se acordou cos clubs que xogan na Lomba.
16.04.2019.- A obra que se vai a acometer consiste na restauración e reforzo da estrutura que soporta a cuberta da grada. Para isto eliminarase o óxido e trataranse os piares para sanealos e reforzalos convenientemente. A actual cuberta será desmontada por unha empresa autorizada e seguindo os procedementos establecidos pola lexislación vixente ao tratarse de materiais que conteñen amianto. Por último, instalarase a nova cuberta de paneis de chapa grecada. A xeometría e as características construtivas do novo tellado serán similares á da grada principal ou de tribuna. A actuación tamén prevé a instalación de pasamáns e varandas protectoras nas zonas de escaleiras.
Esta obra enmárcase no plan de mantemento e mellora das infraestruturas deportivas que leva a cabo o Concello e a través do cal tamén se cambiará a herba artificial do campo municipal de fútbol de Vilaxoán e se reparará a cuberta do pavillón de Faxilde, obras xa aprobadas e en proceso de tramitación para ser executadas nos vindeiros meses.