TURISMO
As ladeiras de Xiabre acollen o sábado a andaina Vilagarciá do Goza do Ulla O programa de andainas “Goza do Ulla” que de desenvolve en varios municipios ribeireños fai escala o sábado, 25 de maio, en Vilagarcía. O paseo programado no noso Concello consistirá nunha andaina de 17 quilómetros polas ladeiras do monte Xiabre que permiten admirar a desembocadura do Ulla na ría de Arousa. Os interesados poden anotarse a través do mail oficinaturismo@vilagarcia.gal ou do teléfono 986 501 227. A participación é de balde.
20.05.2019.- “Circular polo Xiabre, dende o miradoiro sobre o Ulla ata o encoro” é o título da andaina deseñada pola Concellería de Turismo de Vilagarcía para este programa. O percorrido iniciarase ás 9 da mañá en Pinar do Rei (na entrada ao Punto Limpo), dende onde os participantes encamiñaranse cara o miradoiro de Bamio para admirar a espléndidas vistas que dende alí se teñen da desembocadura do Ulla en augas da Ría da Arousa. O paseo continúa para acadar outra atalaia que permite divisar fermosas panorámicas sobre Vilagarcía e a Ría.
O roteiro prosegue polas sendas do monte cara o curso alto do río do Con, que se cruzará deixando á dereita unha pequena cascada para iniciar a baixada por camiños con grandes vistas e que levarán aos camiñantes ata o encoro do Con que bordearán para emprender o regreso polo paseo de castiñeiros e os camiños forestais ata chegar ao punto de partida.
A andaina ten unha lonxitude de 17 quilómetros e considérase de dificultade media. O Concello de Vilagarcía entregará botellíns de auga e froita a cada participante do roteiro a modo de avituallamento.