CULTURA
O Ágora Vermú continúa o domingo na Baldosa cos ritmos contaxiosos dos Cachas&Cousins A zona de viños da Baldosa será o escenario no que recalará este domingo, 26 de maio, o ciclo de concertos matutinos do Ágora Vermú programado pola Concellería de Cultura. Os encargados de animar a sesión son os compoñentes de Cachas&Cousins, unha numerosa formación compostelá caracterizada polos seus ritmos contaxiosos e as súas versións coas que actualizan clásicos dos tempos das nosas avoas que animan a ser cantados por todo o público. O concerto terá lugar na confluencia das rúas Valentín Viqueira, A Baldosa e Rey Daviña e comezará ás 13:00 horas.
24.05.2019.- Cachas&Cousins nace en Santiago de Compostela no ano 2014 da unión de certas inquedanzas que xorden no interese dos seus membros pola música xamaicana e os seus ritmos contaxiosos. A formación recolle, mestura e reinterpreta estes ritmos antigos, levándoos a súa propia particularidade. Inclúe no seu repertorio clásicos da escena rocksteady, do R&B e do soul xamaicano, principalmente deses anos 60, e algúns outros temas, clásicos de todos nos, como “Bésame mucho”, “La llorona” ou “Perfidia”, levados á linguaxe musical nese eido. Esta proposta tenta reproducir o formato de orquestra rocksteady, especialmente pensada para o directo.
Cachas&Cousins son: Nerea Vello e Dolores Rey (voces), Pablo Vázquez (guitarra), Diego Novoa (baixo), Alexander Fill (saxo), Juan Lindín (trompeta), Adrián Moro (percusión) e Fran Trilli (batería).