MEDIO AMBIENTE
Costas inicia a recuperación de áridos na praia do Preguntoiro Tal como xa se tiña anunciado e acordado entre Costas, o Concello e a agrupación de mariscadoras de Vilaxoán, o departamento estatal iniciou hoxe os traballos de recuperación da area que o mar arrastrou cara a lámina de auga. A maquinaria comezou a traballar a primeira hora da mañá, aproveitando a marea baixa, e a previsión é que a praia distinguida coa Bandeira Azul volva e a estar en perfectas condicións para o seu uso por parte dos bañistas esta semana.
01.07.2019.- O inicio dos traballos por parte de Costas foi comunicado ás mariscadoras que xa hai uns días remataron a retirada do marisco da zona na que se vai a recoller a area que se levou a acción do mar.
Como xa se comentara, a actuación acordada cos técnicos de Costas consistirá en recuperar os áridos levados cara o interior da lámina acuática para volvelos a depositar na zona seca da que foron arrastrados. A actuación coordinouse coas mariscadoras por afectar a unha zona de explotación, contándose dende un principio coa súa total colaboración e disposición para favorecer e compatibilizar o uso marisqueiro e turístico da Praia do Preguntoiro, un dos principais recursos de Vilaxoán.
O acto de izado da bandeira azul no areal levarase a cabo tan pronto como remate o movemento da area.