CONCELLO
O Concello comprará o triángulo da desembocadura do Con para crear un tanque de tormentas e un estacionamento O goberno local de Vilagarcía prevé destinar 130.000 euros dos orzamentos municipais de 2019 á adquisición do triángulo de terreo situado na desembocadura do río do Con co obxectivo de construír un tanque de tormentas baixo terra e habilitar un aparcamento público en superficie. A medida financiaríase a través do préstamo de 550.000 euros que o executivo local inclúe no proxecto dos Orzamentos Municipais de 2019 que se presentou esta mañá á Xunta de Voceiros.
16.07.2019.- Este triángulo de terreo de titularidade privada atópase actualmente nun estado de abandono que afea considerablemente o paseo fluvial e a muralla do conxunto monumental de Vista Alegre ao pé da que se asenta. A compra suporía dous grandes beneficios: Por un lado permitiría construír baixo terra un tanque de tormentas de gran capacidade comprometido por Augas de Galicia para reducir en ata un 80% os verquidos ao mar e o risco de inundacións. E por outro, permitirá habilitar unha nova zona de estacionamento público e gratuíto, ordenado e en condicións para dar servizos aos vilagarciáns e aos usuarios da Praza de Abastos.