CONCELLO
Concello e Colexio de Arquitectos estudan colaborar na organización de actividades formativas e eventos en Vilagarcía O Concello de Vilagarcía e a delegación provincial do Colexio Oficial de arquitectos de Galicia explorarán as fórmulas de colaboración posibles para a organización no municipio de actividades formativas e eventos relacionados coa arquitectura e o urbanismo. Esta liña de actuación conxunta acordouse na reunión mantida esta mañá no Concello entre o alcalde, Alberto Varela, e os integrantes da directiva da delegación Pontevedra do COAG, composta por Anselmo Villanueva Peón (presidente), María Pierres López (secretaria) e Carlos Berride Abalo (tesoureiro).
03.10.2019.- A directiva do COAG en Pontevedra acaba de ser renovada, de aí que estea realizando unha rolda de visitas aos concellos da súa área de influenza a efectos de presentarse aos rexedores, establecer unha relación fluída entre o sector e as administracións locais á hora de xestionar e tramitar proxectos e asuntos urbanísticos, así como para ofrecer a colaboración do organismo na realización de actividades conxuntas de interese para os municipios.
O rexedor local informoulles da organización e xestión municipal dos asuntos urbanísticos a través da Xerencia de Urbanismo e do modelo de cidade no que traballa on executivo local. Ademais, Varela interesouse por asinar algún tipo de convenio co colexio que permita a realización en Vilagarcía de cursos ou congresos ou mesmo de acoller eventos promovidos directamente polo COAG. Ambas partes quedaron en analizar o tema con maior detalle co obxecto de elaborar propostas neste sentido.