CONCELLO
O campamento infantil de Nadal organizado por Xuventude disporá de 50 prazas gratuítas A Xunta de Goberno local aprobou onte as bases que rexerán o campamento urbano de Nadal que organiza a Concellería de Xuventude no marco dos programas lúdico educativos e de conciliación familiar. A actividade, dirixida a nenos e nenas de 3 a 7 anos de idade, contará con 50 prazas gratuítas. O prazo de inscrición vai do 11 ao 28 de novembro.
05.11.2019.- O Campamento Urbano de Nadal celebrarase nas dependencias do CEIP da Lomba coincidindo co período vacacional nos colexios, é dicir, os días 23, 24, 26, 27, 30 e 31 de decembro e 2 e 3 de xaneiro. As actividades desenvolveranse en horario de mañá (de 9 a 14 horas).
Os únicos requisitos que deben cumprir os nenos e nenas que desexen participar no campamento son estar empadroados en Vilagarcía e ter nacido entre o 1 de xaneiro de 2012 e o 31 de decembro de 2016.
No caso de que o número de solicitudes supere ao de prazas dispoñibles, estas adxudicaranse mediante sorteo público a realizar o día 11 de decembro ás 12 do mediodía no Concello. En calquera caso, terán preferencia os fillos e fillas de mulleres vítimas da violencia de xénero, así como os derivados dos Servizos Sociais do Concello, para os que se reserva unha porcentaxes de ata o 25% do número total de prazas.
Os formularios de inscrición poden recollerse nas dependencias de Xuventude ou imprimirse dende o taboleiro de anuncios da web municipal, onde tamén están dispoñibles as bases da do campamento. Unha vez cuberto o formulario deberá presentarse, xunto coa documentación indicada nas bases, no Rexistro Xeral do Concello en horario de 8.30 a 14.30 horas, de luns a venres, ou a través do rexistro telemático (sede.vilagarcia.gal).