CONCELLO
A residencia Divina Pastora adquirirá o solar anexo para a futura ampliación do centro A Fundación Asilo Hospitalillo Divina Pastora de Vilagarcía chegou a un acordo para adquirir o solar situado a carón da residencia co obxecto de levar a cabo unha futura ampliación da residencia situada na Rúa Ramón López Piñeiro. A operación, na que o Concello tivo un papel destacado como mediador entre as partes, consiste la compra de 680 metros cadrados de terreo por importe de 170.000 euros.O acordo abre a vía para que a Fundación poida levar a cabo no futuro a necesaria ampliación da residencia de anciás.
15.12.2019.- A Fundación Asilo Hospitalillo Divina Pastora é unha entidade de carácter privado rexida por un Padroado do que forman parte varias entidades, entre elas o Concello de Vilagarcía e a parroquia Santa Baia de Arealonga. A presidencia recae, segundo os estatutos, na Alcaldía do Concello, de aí que o alcalde, Alberto Varela se ofrecese a asumir as labores de mediación e negociación para a compra dos terreos propiedade de Abanca.
O solar ten unha superficie en planta de 680 metros cadrados que, segundo a cualificación urbanística parcela, permite acadar unha edificabilidade de 2.452 metros de superficie útil, o que supón un importante marxe de manobra para os plans de ampliación da residencia.
A residencia Divina Pastora conta actualmente con 100 prazas, das que 54 son de carácter concertado. O Concello de Vilagarcía tamén dispón dunha praza para casos de emerxencia social derivados dos Servizos Sociais Municipais.
Nos últimos anos, o centro foi obxecto de varias melloras. A máis importante a que se levou a cabo durante a presidencia do Padroado da alcaldesa, Dolores García, e que consistiu na reforma do segundo andar para adaptar as habitacións á normativa de accesibilidade e adecualas ás necesidades de usuarios de gran dependencia, e na dotación de mobiliario específico. Nesa obra investíronse 180.000 euros financiados a través da participación de Concello, Estado, Xunta, Deputación e unha achega de socios anónimos de do Club de Leones.