CONCELLO
Emerxencias e Policía utilizan máquinas de ozono para desinfectar os seus vehículos O Concello de Vilagarcía recibiu esta mañá as dúas máquinas de ozono adquiridas para axilizar e facer máis efectivas as labores de desinfección dos vehículos da Policía Local e do Servizo Municipal de Emerxencias e Protección Civil. A utilización deste sistema permite levar a cabo unha desinfección máis exhaustiva e rápida que a limpeza manual, posto que o gas expándese e chega a todos os recobecos e superficies. Ámbolos dous servizos xa están utilizando a maquinaria para hixienizar todos os vehículos nos cambios de quenda ou despois de servizos por casos sospeitosos de coronavirus.
01.04.2020.- As máquinas, que funcionan con electricidade, xeran ozono mediante un proceso electroquímico. Semellan unhas pequenas caixas metálicas que se introducen dentro do vehículo baleiro e pechado. O gas que emanan debe actuar durante 10 minutos para que o ozono mate todos os virus, bacterias e calquera outro microorganismo existente. Tras a desinfección, airéase o vehículo para volva a estar en perfectas condicións para volver a ser utilizado. O ciclo completo dura uns 20 minutos.
Ademais de usalos nos coches patrulla, nas ambulancias e demais vehículos de emerxencias do Concello, as máquinas tamén servirán para desinfectar os traxes de traballo do persoal do servizo de Emerxencias e Protección Civil, que despois de cada uso se colga nun habitáculo reducido que se inundará con ozono. Con estas máquinas o Concello continúa implementando os medios para que o persoal municipal que está exposto durante a crise sanitaria poida desempeñar as súas funcións debidamente protexidos e nas mellores condicións de seguridade.
Material distribuído
Xa nas semanas anteriores o Concello distribuíu todo o material que adquiriu directamente ou que lle foi chegando. En total xa se repartiron 1.625 máscaras (cirúrxicas, ffp3 e ffp2), 5.300 pares de luvas, 250 buzos, 80 carapuchas, 20 litros de xel hidroalcólico, e 13 gafas.
O material protector repartiuse tanto entre servizos municipais como entre colectivos e centros que o precisaban debido a súa labor social. Foron para o Servizo Municipal de Emerxencias e Protección Civil, a Policía Local, a Residencia de Anciás Divina Pastora, o Servizo de Axuda no Fogar, o Comedor Social de Cáritas, para persoal municipal, o albergue que xestionan Cruz Vermella e Concello, e os Voluntarios que colaboran cos Servizos Sociais municipais.
A previsión do Concello e continuar co reparto de novo material así como se vaia recibindo.