CONCELLO
Denunciados tres establecementos de ocio nocturno por incumprir as normas de protección contra o COVID A Policía Local de Vilagarcía cursou nos últimos días tres denuncias a outros tantos establecementos hostaleiros e de ocio nocturno por incumprimento das normas de protección contra o coronavirus. Seguindo o procedemento establecido durante o Estado de Alarma, as denuncias serán remitidas á Subdelegación do Goberno que é o órgano competente para impoñer as sancións que correspondan en cada caso. O goberno local insta á toda á cidadanía, tanto a clientes como a hostaleiros, a cumprir as normas de seguridade e advirte que un rebrote do COVID, ademais de poñer en risco a vida das persoas, podería obrigar a un novo confinamento para toda a poboación.
01.06.2020.- As denuncias cursadas pola Policía correspóndense a 3 establecementos de tres zonas diferentes do municipio onde se detectaron comportamentos de especial risco por incumprimento das normas establecidas para a segunda fase da desescalada do Estado de Alarma na que nos atopamos.
Para abordar a problemática que se está a dar e quedou patente esta fin de semana con aglomeración de persoas en determinadas zonas de ocio, o alcalde contactou esta mesma mañá as representantes da asociación de hostaleiros, Ahituvi, para convocalos a unha reunión que terá lugar o mércores.