VILAGARCIA DE AROUSA

CONCELLO
O Concello remata as melloras no baixo da sede do servizo municipal de Emerxencias
O Concello de Vilagarcía vén de rematar as últimas actuacións levadas a cabo para continuar mellorando os equipamentos e instalacións do Servizo Municipal de Emerxencias. Hai uns días remataron os traballos de substitución da cuberta do baixo da sede situada na avenida Agustín Romero, así como a instalación dos portais de peche da zona dos garaxes. O investimento realizado polo Concello nesta obra ascendeu a 46. 258 euros que se financiaron con cargo ao Plan Concellos da Deputación.

12.06.2020.- As obras adxudicadas á empresa Sergonsa Servicios centráronse nas naves do baixo do edificio e consistiron na substitución do material de cobertura da nave e na instalación de tres portais de peche, no que antes era especia de soportal aberto. Coa primeira intervención resolvéronse os problema de filtracións e humidades que se rexistraban na nave debido ao mal estado no que se atopaba a vella cobertura de chapa. E coa instalación dos portalóns mecanizados mellórase a seguridade, o funcionamento e a operatividade do servizo. O pechamento móbil permite manter os vehículos e material debidamente protexidos coas instalacións pechadas á vez que permite unha rápida apertura para entrada e saída de camións e cando sexa preciso.

Esta non é a única actuación de mellora nos equipamentos e instalacións do Servizo de Emerxencias proxectadas polo executivo local. A primeira foi o remate das fachadas do inmoble, que levaba inacabada dende había dúas décadas co ladrillo á vista ou partes simplemente recebadas con cemento. Nesta obra investíronse 60.000 euros que permitiron instalar un illamento térmico, selar fendas e acabar cos problemas de filtracións de auga e humidades no interior do inmoble que tamén acolle a sede da Escola Obradoiro, sanear, revestir e pintar axeitadamente as paredes exteriores. Tamén se retellou o edificio e substituíron as claraboias do baixo cuberta.

Ademais, o goberno local xa ten programada unha nova actuación na sede de Emerxencias e do Obradoiro de Emprego, consistente na instalación dun ascensor, elemento do que actualmente carece o inmoble. Esta actuación enmárcase nas actuación de mellora da accesibilidade de edificios municipais.