MEDIO AMBIENTE
A bandeira verde volve a ondear no Preguntoiro A bandeira verde volve a ondear na Praia do Preguntoiro ao demostrar a contra análise realizada pola Dirección Xeral de saúde que as augas de baños contan con todas as garantías de salubridade. O Concello recibiu a comunicación dos resultados ás 13.30 horas de hoxe, mércores 5 de agosto, despois de que onte se requirira telefonicamente á Consellería que informase da situación dados os días transcorridos dende que se advertira do episodio que obrigou a desaconsellar o baño no areal vilaxoanés.
05.08.2020.- O Concello de Vilagarcía mantén conversas cos responsables de Sanidade para que modifiquen o procedemento a aplicar nos casos nos que se detectan resultados anómalos, sobre todo cando estes se producen en plena temporada de baño. O Concello demanda un protocolo de actuación máis áxil para evitar situacións lesivas como esta última do Preguntoiro, cando un episodio puntual acontecido o pasado martes, 28 de agosto, cando se toma a mostra, comunícase dous días despois, o xoves 30; a nova mostra non se toma ata o domingo 2 de agosto, 5 días despois do episodio anómalo;e os resultados desta contra análise aínda tardan tres días máis en ser comunicados ao Concello, sumando un período total de 8 días..
O Concello advirte que este sistema tan lento impide adoptar as medidas oportunas para protexer a saúde dos bañistas cando realmente se dan as causas de risco, e tamén causa graves prexuízos á imaxe da praia e tamén aos seus usuarios. ao prolongar máis tempo do realmente necesario a recomendación de non bañarse.
Ao igual que aconteceu hai semanas na Compostela, o do Preguntoiro foi un caso puntual de concentración microbiolóxica por riba dos parámetros normais, producido un día en concreto Todo apunta a que os niveis volveron á normalidade ao día seguinte, a e maila isto a lentitude dos procedementos obrigou a ter izada a bandeira amarela durante cinco días de verán e de elevadas temperaturas. Dende o Concello opínase que esta situación podería terse evitado tomando as mostras para a contra análise ao día seguinte , ou á segunda xornada como moito, da primeira mostra que da resultados negativos, e cunha comunicación más áxil.