VILAGARCIA DE AROUSA

CONCELLO
A xunta xestora da asociación de veciños de Vilaxoán preséntase oficialmente no Concello
O goberno local de Vilagarcía recibiu esta mañá aos integrantes da recén constituída xunta xestora da asociación de veciños de Vilaxoán. Tratouse dunha reunión formal de presentación oficial da xestora ante o Concello e que terá continuidade nas vindeiras semanas con novos encontros cos que continuar traballando conxuntamente na consecución de novas melloras para a localidade vilaxoanesa que se sumarán ás xa executas ou que o goberno local ten actualmente en marcha.

07.07.2020.- O alcalde, Alberto Varela, presidiu a representación municipal da que tamén formaron parte a voceira do goberno, Tania García e o concelleiro e veciño de Vilaxoán, José María González. Por parte do colectivo veciñal asistiron os sete membros que compoñen a xestora, todos eles integrantes de anteriores directivas polo que contan cunha extensa experiencia na dirección da asociación así como en exercer de interlocutores do pobo de Vilaxoán ante o Concello. Son Juan José Outes, Teo Cardalda, Joaquín Santamaría, Marcos Casás, Ramiro González, Miguel Miguéns e Tomás Rodríguez.

O rexedor destacou esta circunstancia e agradeceulles a súa disposición para poñerse ao fronte e non deixar morrer a un colectivo pioneiro en Galicia, posto que a de Vilaxoán foi a segunda asociación veciñal constituída en Galicia nos albores da democracia, concretamente no ano 1976. Varela Paza agradeceulles a todos eles o traballo realizado durante estes anos en beneficio de Vilaxoán e fixo extensivo o agradecemento ás demais persoas que formaron parte das sucesivas directivas.

A xestora informou ao goberno de que a asociación de veciños segue activa e operativa con eles ao fronte e ata o momento en que se elixa á nova xunta directiva, proceso que conlevará a realización do correspondente proceso electoral O vindeiro xoves, unha delegación do goberno municipal encabezada polo alcalde visitará Vilaxoán para manter outro encontro da xestora do colectivo veciñal.