VILAGARCIA DE AROUSA

CONCELLO
O Concello saca a licitación a construción do albergue de peregrinos de Carril cun investimento de 600.000 euros
O Concello de Vilagarcía vén de sacar a licitación a construción do albergue de peregrinos de Carril, un dos proxectos máis ambiciosos do actual mandato e co que o goberno de Alberto Varela pretende potenciar o sector turístico local aproveitando a fonda tradición Xacobea coa que conta Vilagarcía, punto de inicio da Ruta Marítimo-Fluvial do Mar de Arousa-Ulla. Cun investimento de 600.000 euros (impostos incluídos), o Concello reformará a inacabada ampliación da Casa de Cultura de Carril para convertela nun moderno e funcional albergue de 443 metros cadrados de superficie, con capacidade para 30 persoas e dotado de todos os servizos necesarios. As empresas interesadas en executar a obra dispoñen de prazo ata o 14 de setembro para presentar as súas ofertas.

24.08.2020.- O proxecto realizado polo arquitecto Iago Fernández Puentes prevé reformar a estrutura inacabada da casa da cultura para transformala nunha especie de miradoiro á ría, perfectamente integrado na contorna e inspirado típicas casas da arquitectura mariñeira galega e nas industrias conserveiras e de salazón. Seguindo as directrices marcadas dende o Concello, o albergue deseñouse baixo criterios de funcionalidade, eficiencia e calidade, e contará con todos os servizos que precisa un aloxamento para peregrinos: recepción, botiquín, zonas de estar, aseos, duchas, taquillas, dormitorios, lavandería, almacén, gardabicis, terrazas e zona verde. Por suposto, a obra axústase ao especificado pola Xunta de Galicia no Decreto 48/2016, do 21 de abril, polo que se establece a ordenación dos albergues turísticos.

O edificio contará con baixo, primeiro andar e baixo cuberta, así como cun terreo aledaño que se aproveitará como zona de recreo. Na planta baixa, que comunica directamente coa rúa, habilitarase un recibidor, a zona de recepción, un aseo e unha sala de botiquín. Unha suave rampla comunicará o recibidor coa lavandería e coa zona para gardar as bicicletas. Xa para uso restrinxido do persoal, no baixo haberá unha zona de almacén, sala de máquinas para instalar as caldeiras de auga e calefacción, así como os contedores de recollida selectiva de lixo, aos que se poderá acceder directamente dende a rúa para facilitar o seu baleirado e recollida.

Xunto á recepción disporase un ascensor e arrancarán as escaleiras que comunican cos dous andares superiores, que terán unha configuración similar: un amplo distribuidor ao pé das escaleiras e do ascensor, ao redor do cal se ordenarán o resto das estancias: dormitorios, cuartos de aseos, duchas, e salas de estar.

As salas de estar de ámbolos dous niveis estarán intercomunicadas ao configurarse esta zona coma un patio interior abalconado nunha dobre altura e vistas ao exterior a través dunha gran fachada acristalada que comunicará coa terraza. Cada planta contará con zona de taquillas e cuartos de aseo e ducha para homes e mulleres. No primeiro andar disporanse 3 dormitorios e 2 no baixo cuberta, cada un deles con capacidade para 6 persoas, dotados de liteiras, así como mesas individuais de lectura e caixoneiras para gardar efectos persoais.

Zona verde e miradoiro cara a desembocadura do Ulla e o nacemento da Ría
Na parte exterior do andar máis elevado créase un balcón retranqueado respecto ao nivel inferior e que se converte nun miradoiro para admirar as vistas de illa de Cortegada, a ría de Arousa e o inicio da ruta marítimo fluvial Xacobea do Mar de Arousa e Ulla.

Ademais, a actuación proxectada prevé tamén o acondicionamento da finca posterior que se habilitará como área de descanso e esparexemento, así como para a realización de actividades ao aire libre. Os terreos acondicionaranse axeitadamente para habilitar zonas verdes que combinarán céspede con xardineiras e cunha parra de vide de albariño.

Todos os locais do edificio, incluídos os dormitorios e os aseos, cumpren coa normativa vixente de accesibilidade e eliminación de barreiras para persoas con limitacións de mobilidade.

O Concello de Vilagarcía financia esta obra a través do Plan de Obras e Servizos da Deputación Provincial de Pontevedra, o denominado Plan Concellos. A empresa á que se lle adxudique a obra disporá dun prazo de 10 meses para executala.