VILAGARCIA DE AROUSA

INFRAESTRUTURAS
O Concello inicia en setembro as obras de asfaltado e mellora de 23 camiños de parroquias rurais
As máquinas de asfaltado e os pisóns volverán a traballar no rueiro do rural vilagarcián en setembro para executar as obras incluídas no Plan de Asfaltado de Camiños Municipais proxectado polo Concello. O plan inclúe actuar nun total de 23 camiños de diferentes parroquias do rural e barrios da perifria. O proxecto dividiuse en dúas fases que acometerán de forma simultánea as empresas Asfalgal Técnicas Viarias e Construcciones Ponciano Nieto, adxudicatarias dos contratos. O Concello inviste nestas actuaións 183.890 euros que se financiarán a través do Plan Concellos da Deputación.

26.08.2020.- O Concello leva a cabo cada ano un plan de asfaltados co obxectivo de garantir o correcto mantemento da rede viaria municipal, neste caso, centrado exclusivamente na rede secundaria e terciaria que se estende polas zonas do rural e cuxos camiños son de titularidade municipal. O goberno local incluíu neste Plan as vías rurais que precisaban duna actuación máis urxente, tratando de chegar ao maior número de parroquias e barrios. En concreto a unha o varias vías de Rubiáns, Solobeira, Trabanca Sardiñeira, Trabanca Badiña, A Torre, Castroagudín, Bamio, A Laxe, Faxilde, Aralde, Cornazo, así como á travesía Pablo Picasso.

A primeira fase do plan inclúe actuacións en Rubiáns (Rúa Hospital do Salnés e Rúa Rubiáns de Abaixo), Solobeira (Rúa da Escola e Rúa do Sixto), Trabanca Sardiñeira (Travesía Nosa Señora dos Anxos, Travesía Loureiro e Rúa Xiabre), Castroagudín (Travesía Rúa Congostra), A Torre (Avenida Berdón) e a travesía Pablo Picasso. Estas obras adxudicáronse por 76.213 euros.

Na segunda fase e cun orzamento de 107.677 euros actuarase sobre camiños de Rubiáns (Rúa do Charco-Loenzo), Bamio (Travesía Nogueirido), A Laxe (Rúa Monte Xaquín, Quinteiro e Marmelo), Faxilde (Rúa do Xogo), Aralde (Rúa de Aralde e Camiño Prata), e en Cornazo (Rúa Baixada a Pasos, Rúa A Pedra, Camiño da Balada, Rúa Veiga e Camiño dos Borrizos).

Todos os camiños nos que se vai a actuar precisan dunha intervención debido ao desgaste da actual capa de rodadura, a afundimentos ou á presenza de fendas ou fochas. Os traballos aproveitaranse para ensanchar os camiños naquelas zonas onde se levaron a cabo retranqueos para axustar á vía ás aliñacións previstas no PXOM, mellorando así as condicións da calzada e aumentando a seguridade viaria.

Os traballos a realizar consistirán no varrido inicial da superficie dos camiños, a mellora da capa de rodadura mediante asfaltado e a elevación das tapas de rexistro existentes. Cada unha das fases do plan de asfaltado e mellora de camiños ten un prazo de execución de 2 meses.

As adxudicacións das obras aprobáronse a semana pasada e os contratos xa foron asinados polo que os traballos poderán comezar tan pronto como se aproben os respectivos plans de seguridade, previsiblemente na primeira semana de setembro.