BIBLIOTECAS
A Biblioteca recupera o horario dos sábados a partir desta semana mantendo o aforo de 40 persoas A Biblioteca Municipal Rosalía de Castro recupera a partir desta mesma semana o horario dos sábados, polo que estudantes e lectores en xeral poderán tamén acudir ás instalacións ese día en horario matinal, entre as 9 e as 14 horas. As normas serán as mesmas que rexen o resto dos días da semana, con aforo reducido a 40 persoas e seguindo o protocolo que establece as distancias de seguridade, desinfección de mans, limpeza das instalacións, ventilación e mesmo de corentena para os exemplares usados e devoltos no servizo de préstamo.
A Xunta de Goberno Local acordou hoxe volver a establecer a partir do 23 de xaneiro o horario dos sábados que viña sendo habitual antes do inicio da pandemia, a efectos de dar aos usuarios do centro unha maior franxa horaria e posibilidade de uso das instalacións. O horario entre semana, de luns a venres, continuará sendo de 9 1a 14 horas e de 16 a 21, co peche intermedio para facilitar as labores de desinfección e ventilación das dependencias.
Tras o peche pola pandemia, a Biblioteca recuperou a actividade a mediados de xuño retomando o servizo de préstamo e permitindo o uso dios servizos das plantas superiores: salas de estudo e da zona de lectura, así como dos ordenadores. Na sala infantil, situada na planta baixa, non se permite a lectura en sala, aínda que si está operativo o servizo de préstamo.