MEDIO AMBIENTE
Xardíns utiliza auga quente para combater as malas herbas do Parque da Compostela A máquina deshidratadora adquirida o pasado mes de agosto polo Concello está sendo de gran utilidade no mantemento dos xardíns, cunetas e zonas verdes do municipio ao xulgar polos resultados das labores realizadas ata o de agora co novo equipamento que funciona unicamente mediante a expulsión de auga quente. O servizo de Xardíns está usando a máquina para a eliminación de malas herbas nos corredores e zonas de paso do Parque da Compostela, comprobando que os resultados son máis duradeiros que a simple eliminación a man ou con anciño, xa que ao queimar as raíces e posibles sementes coa auga quente a temperaturas próximas aos 100 grados centígrados, as herbas tardan máis en volver a medrar.
12.02.2021.- O Concello de Vilagarcía deixou de utilizar herbicidas hai xa moitos anos, polo que a eliminación das malas herbas facíase de xeito manual. O uso da deshidratadora ademais de aportar rapidez e maior durabilidade, mantén esta liña ecolóxica, posto que ao requirir tan so o uso de auga, supón un método totalmente limpo, ecolóxico e totalmente inocuo para o mantemento dos xardíns.
Os traballos que se están a realizar dende hai uns días no Parque da Compostela dan continuidade aos xa executados no da Concha.