VILAGARCIA DE AROUSA

RELACIÓNS INSTITUCIONAIS
O alcalde reclama de novo ao Porto a reversión ao uso público da antiga Comandancia de Mariña
O alcalde, Alberto Varela, trasladou hoxe ao presidente da Autoridade Portuaria a necesidade de que a antiga Comandancia de Mariña, construída no seu día porque a cidade consentiu en facer un recheo con tal fin, reverta ao concello unha vez que o inmoble perdeu a súa función. A cambio, o goberno local estaría disposto a estudiar unha solución alternativa ao hotel que o Porto pretende facer no Ramal, aínda que será condición indispensable que non supoña unha nova barreira ao mar.

Estes temas, ademais da liberación do Ramal ou a modificación do PXOM, son os fundamentais sobre os que comezará a traballar unha comisión mixta Concello-Porto dende o vindeiro martes. O alcalde entende que tanto nuns como noutros temas hai marxe de negociación e solucións técnicas, e confía que nun prazo de dous meses poidan estar aclarados todos eses asuntos, preferiblemente cun acordo por ambas partes.

A posición do goberno local sobre a antiga Comandancia é ben coñecida. Sempre apostou porque alí se instale o centro de saúde que a cidade necesita. Alberto Varela cree que pode lograrse se hai vontade de chegar a acordos, do mesmo xeito que coa pretendida construción dun hotel na parcela portuaria do Ramal. Neste sentido, o alcalde trasladou a Tourís que se o Porto arbitra unha solución para a comandancia, tamén o concello estará disposto a estudiar unha saída ao proxecto do hotel.

PXOM E FERRAZO
O alcalde tamén trasladou a Cores Tourís toda a disposición política e técnica para desbloquear os outros temas que máis preocupan ao porto, pero tamén ao concello. Por unha banda, a modificación do Plan Xeral para dar cabida aos recheos feitos nos últimos anos e con iso posibilitar a dotación de máis espazos de almacenamento na peirao de Ferrazo; e, por outro, a liberación do peirao do Ramal, de xeito que reverta tamén no uso público nunha zona privilexiada entre o peirao deportivo e a praia da Concha.

Como mostra da vontade de “desatascar” estes temas, alcalde e presidente do porto acordaron constituír unha comisión ou grupo de traballo que iniciará o vindeiro martes unha serie de reunións periódicas. Varela estima que dous meses deberían ser suficientes para chegar a un acordo sobre cada un dos asuntos abordados hoxe.