CULTURA
Cinco dos principais conservatorios de España confirman a súa presenza nas masterclasses do clasclás 2021 Cinco dos principais conservatorios profesionais de música de España –os de Madrid, Barcelona, San Sebastián, Salamanca e Vigo- xa confirmaron a súa participación no Festival Internacional de Música Clásica de Vilagarcía de Arousa, Clasclás, que se celebrará entre o 28 de xuño e o 3 de xullo. O programa será presentado esta tarde, vía streaming, na páxina de Facebook do festival: https://www.facebook.com/clasclasfest /
18.03.2021. O programa de masterlasses será impartido pola dirección artística do festival, o Trío Guarneri de Praga, do que partiu a idea da súa organización e para agrupacións similares á que eles conforman, é dicir: piano, violín e cello. Deste xeito, cada un dos cinco centros superiores participantes neste programa seleccionou de entre os seus alumnos un Trío de piano. Ao longo do curso académico están a estudar cos seus profesores un repertorio que despois presentarán para as Masterclasses. Serán aproximadamente unhas 12 sesións que, se a situación o permite, serán abertas ao público.
Na presentación do programa participaron: Argimiro Serén, concelleiro de Educación de Vilagarcía; Esteban Valverde, director do Conservatorio Superior de Música de Vigo; María José García, directora do Conservatorio Superior de Castela e León, con sede en Salamanca; Miren Iñarga, directora académica do Centro Superior de Música do País Vasco (MUSIKENE), desde San Sebastián; Juan A. Mendoza, director artístico da Escola Superior de Música Raíña Sofía, de Madrid; Nuria Sempere, directora xeral da Escola Superior de Música de Cataluña (ESMUC), desde Barcelona; e Rosina Sobrido, directora do Conservatorio de Vilagarcía e responsable técnica do clasclás.
AXUDAS DE DESPRAZAMENTO E ALOXAMENTO O Concello de Vilagarcía considera que coa organización deste programa de masterclasses, o festival adquire unha nova dimensión institucional e dá un paso adiante nas actividades paralelas ao clasclás. "Unha das prioridades do Concello é que o festival se achegue cada vez sexa máis a toda a comunidade, crendo firmemente nos valores, beneficios e na inmensa riqueza que a música achega á nosa sociedade, á vez que se profunda no terreo formativo". Exemplo disto é que o concello incentivará aos participantes cunha axuda de desprazamento e outra de aloxamento ao longo do festival, ao que se une a gratuidade das masterclasses cun trío, o Guarneri de Praga, que é un referente mundial.