CONCELLO
O concello destina 50.000 euros a subvencionar a creación de postos de traballo en empresas O goberno de Alberto Varela aprobou onte unha nova edición da convocatoria de axudas para fomentar a contratación de traballadores por conta allea. A contía é de 50.000 euros e en función das características da empresa e o cumprimento dunha serie de requisitos, a axuda oscilará entre os 500 e os 3.000 euros.
21.07.2021. A presentación de solicitudes estará en vigor unha vez que se publiquen as bases no boletín oficial da provincia (BOPP) –normalmente, a vindeira semana- e permanecerá aberto ata o 15 de outubro. Estas axudas se suman ás que se destinan ao emprendemento e a creación de novos negocios, por importe de 42.000 euros, cuxas solicitudes xa se poden realizar ata o 30 de setembro ou o 31 de outubro, segundo cando se creara o negocio ao longo de 2020.
No caso das axudas á contratación por conta allea, unha das súas características principais é que están abertas a calquera industria radicada nas comarcas do Salnés ou de Caldas, pero coa condición de que o beneficiario/a do contrato teña residencia en Vilagarcía de Arousa, cunha antigüidade mínima no padrón de habitantes dun ano. Os contatos a subvencionar terán que ser a tempo completo en calquera das modalidades contractuais vixentes, unha duración mínima de seis meses e deberán estar formalizados entre o 1 de decembro de 2020 e o 30 de setembro de 2021. As empresas poderán obter axudas para un máximo de tres contratacións.
Como parece obvio, non poderán participar na convocatoria as empresas acollidas a plans de reconversión, nin as que non se atopen ao corrente coas súas obrigas coa SEguridade Social ou a Facenda (estatal e autonómica) nin tampouco co Concello de Vilagarcía, nin, por suposto, aquelas que foran sancionadas por vulnerar os dereitos laborais ou de seguridade dos seus traballadores.