SERVIZOS SOCIAIS
ACOUGA e o Concello informan nunha charla sobre o sistema de acollemento familiar No marco das liñas de colaboración e do convenio que o Concello de Vilagarcía asinará coa Asociación Galega de Familias de Acollida, ACOUGO, o Auditorio Municipal acolle o vindeiro martes, 14 de decembro unha charla informativa sobre o sistema de acollemento temporal de nenos e menores de idade que se atopan en situacións de vulnerabilidade e desprotección. A actividade comeza ás 19.00 horas e está aberta a toda a poboación. Para asistir só será preciso inscribirse previamente.
29.11.2021.- A charla leva por título “Contigo Florece. Xerando Cultura de Acollemento”, e a súa intención é a de dar formación e difusión sobre o sistema de protección de menores e concretamente, ao sistema das familias de acollida. Debido á relevancia social deste tema, tanto a Concellería de Servizos Sociais como ACOUGA animan á veciñanza a asistir para informarse sobre esta medida tan descoñecida e á vez tan beneficiosa para a rapazada e tamén as familias que os reciben. Búscase achegarlle á sociedade a realidade das nenas, nenos e adolescentes en situación de desprotección e dar a coñecer o acollemento familiar.
Para o desenvolvemento da actividade seguiranse as medidas establecidas por mor da COVID-19, polo cal resulta preciso anotarse previamente a través do teléfono de contacto da asociación 622 672 188, enviando un correo a info@acougo.gal ou cumprimentando o formulario de inscrición: “Inscrición Vilagarcía” ao que se pode acceder a través do enlace: https://forms.gle/GQ2m8aPEc5XNafRr9