VILAGARCIA DE AROUSA

FESTAS
A Festa das Uvas regresa tras dous anos de espera para recibir o 2023 en comunidade e con música en directo
Despois de dous anos de espera debido ás restricións da pandemia, os vilagarciáns poderán volver a reunirse o 31 de decembro a mediodía ante o Concello para celebrar a chegada do novo ano. A esperada Festa da Toma das Uvas regresa a Vilagarcía cos moitas gañas de ilusión por poder recuperar un dos eventos máis multitudinarios, especiais e esperados da cidade. Espectáculo de acrobacias, animación e música en directo serán os elementos da celebración que comezará sobre as 11 da mañá e na que non faltarán as uvas ou gominolas e a copa de cava ou refresco para acompañar as doce badaladas que dará o reloxo de Ravella ás 12 do mediodía e que servirá de ensaio xeral á celebración máis íntima que terá lugar pola noite en cada fogar.

22.12.2022.- 350 quilos de uvas, unhas 300 botellas de cava, centos de racións de gominolas e de bebidas sen alcohol para os máis cativos son os ingredientes tradicionais da Festa da Toma das Uvas de Vilagarcía, que este ano volve a contar co aderezo da animación musical, unha performance con acrobacias da compañía Pablo Méndez e co fin de festa dun miniconcerto en directo do grupo Galifunk Brass.

O Concello de Vilagarcía xa celebra A Festa da Toma das Uvas dende o ano 1998 cando, se decidiu institucionalizarse unha ide que partira un ano antes de forma espontánea e como unha iniciativa dun grupo de voluntarios colaboradores da Concellería de Xuventude e Voluntariado que se reuniron un mediodía do día 31 de decembro na Praza de Galicia para celebrar entre amigos a chegada do novo ano, xa que a noite queda reservada para as celebracións no ámbito familiar.

A edición deste ano será a vixésimo segunda, coincidindo co ano que se despedide, o 2022, como advertiu o alcalde, Alberto Varela, durante a presentación da festa. “O que conseguiron estes dous anos de parón pola pandemia foi facer coincidir o ano que despedimos co número de edicións celebradas. O rexedor animou aos vilagarciáns e ás persoas dos municipios veciños a achegarse a Vilagarcía o sábado 31 pola mañá para compartir de forma multitudinaria a experiencia da toma das uvas nesta entrañable e orixinal festa, “unha das primeiras coas que se adianta a chegada do novo ano en toda Galicia”.

Tras todos estes anos, e téndose convertido xa nun evento fixo na axenda e moi esperado cada ano, Varela destacou o carácter dinamizador desta festa, tanto no eido lúdico e festivo, como no que á economía se refire, xa que atrae á vila a moita xente que aproveita para facer compras no comercio local e para tomar algo nos establecementos hostaleiros da cidade.

Pola súa banda, a concelleira de Xuventude, Alba Briones, destacou a implicación de empresas e colectivos económicos e sociais na Festa das Uvas, con colaboracións e patrocinios como os que realizan Supermercados Froiz, o Centro Comercial Arousa, Zona Aberta, La Metro Vilagarcía, a asociación Arousa Moza, Ahituvi, Baygar, Pirotecnia Penide e Servizos Integrais de Formación –SIF. “Agradecemos moito esta implicación porque entra na filosofía que tratamos de promover dende o Concello de facer Vilagarcía entre todos, participando todos e contando con todos, como acontece con programas como os bonos Son da Casa e outro tipo de iniciativas”, apuntou Briones Gamarra.

Neste punto tamén coincidiu o director do centro Comercial Arousa, unha das entidades patrocinadoras, que participou na presentación da festa. Luis González agradeceu tamén ao Concello a oportunidade de participar nun evento tan emblemático e importante para a cidade como é a Festa da Toma das Uvas, así como a posibilidade de que o centro Comercial corresponda a outras iniciativas municipais como levar ao Centro Comercial o Delorian da exposición do CURTAS ou abrir a participación dos bonos Son da Casa aos seus establecementos.