CULTURA
Comezan os traballos para a redacción do novo regulamento de uso dos centros culturais municipais Tal como se comprometera no último Pleno, o goberno local puxo en marcha hoxe o mecanismo para crear o novo regulamento de uso dos centros culturais do municipio que substituirá ao texto aprobado de xeito unilateral polo anterior executivo do PP co rexeitamento do resto de grupos da Corporación e a oposición dos colectivos. Na primeira reunión estiveron representados os cinco grupos municipais. O goberno socialista avanzou algunha proposta, emprazándonse os concelleiros para a semana próxima co obxecto de continuar traballando xa con máis aportacións.
09.02.2013.- Por parte do goberno acudiron á xuntanza a tenente de alcalde, Tania García, e a Concelleira de Cultura, Sonia Outón. O PP estivo representado pro Rocío Llovo, a que fora responsable de Cultura no anterior mandato; e os voceiros dos restantes grupos da Corporación Jesús López (EU), Xavier Ríos (BNG) e Gaspar Somoza (Somos).
Dado o rexeitamento social do regulamento do PP, o executivo socialista propuxo coller como documento base sobre o que traballar o borrador consensuado no seu día polos colectivos veciñais e culturais e que fora subscrito polos grupos da oposición. O goberno considera que, independentemente de ampliacións ou melloras que se poidan introducir agora, partir do documento proposto polos propios colectivos supón xa un punto de arranque de consenso.
Como achega a maiores para recoller todo tipo de situacións e previr conflitos no que á concesión da xestión dos centros culturais se refire, as concelleiras socialistas propuxeron que no caso de haber máis dun colectivo interesado, a adxudicación se faga mediante a valoración e baremación obxectiva dos proxectos que deberán presentar as entidades e nos que se recollerán aspectos como o programa de actividades a organizar no centro, o número de participantes e impacto das mesmas; así como outros aspectos relativos á traxectoria do colectivo ou número de socios, entre outras.
Ademais, o goberno propuxo a creación dunha comisión composta por representantes de todos os grupos da Corporación e do colectivo de asociacións para encargarse de valorar e dirimir nestes casos. Pola súa banda, López pediu que se inclúa nesta comisión unha representación do Consello Local da Cultura, órgano pendente de creación. O voceiro de EU tamén plantexou a definición de modelos diferentes de xestión en función das características de cada centro cultural e dos seus usuarios, aínda que non concretou ningunha proposta.
En todo caso, os edís da oposición recolleron copia do borrador de regulamento proposto en 2013 polas asociacións veciñais e culturais para estudialo, e emprazáronse para o vindeiro xoves a efectos de continuar traballando coa aportación de novas propostas.
Unha vez rematado o proceso por parte dos grupos da Corporación, convocarase aos colectivos e asociacións para expoñer o documento e coñecer a súa opinión.