VILAGARCIA DE AROUSA

CONCELLO
O Concello saca a licitación a elaboración da relación de postos de traballo
O alcalde asinou onte a resolución para sacar a licitación a elaboración da Relación de Postos de Traballo do Concello, poñendo de manifesto a intención do goberno local de contar coa maior brevidade co documento que permitirá contar cun organigrama axustado á realidade e necesidades actuais da administración local, así como corrixir as carencias e atender as demandas expostas polo persoal municipal baixo os criterios de eficiencia e eficacia. O Concello destina 50.000 euros para a RPT que deberá estar realizada e entregada no prazo máximo de 12 meses.

Os traballos que se sacan a licitación inclúen o estudo, documentación, análise, descrición e catalogación dos postos de traballo do Concello para a posterior valoración e confección dunha nova RPT, documento necesario para cumprir o precepto legal relativo a que a planificación dos recursos humanos das administracións públicas terá como obxectivo contribuír á consecución da eficacia na prestación dos servizos e da eficiencia na utilizació´n dos recursos económicos dispoñibles mediante a dimensión axeitada dos seus efectivos, a súa mellor distribución, formación, promoción profesional e mobilidade.
Tres fases
Nos pregos de licitación establécese que os traballos realizaranse en 3 fases. A primeira, de que deberá rematarse nos tres primeiros meses, consistirá no análise e deseño da organización municipal; actualización da descrición funcional de servizos e unidades e a proposta organizativa e de dotacións.
A segunda fase realizarase en outros 3 meses e centrarase na realización do Catálogo de Postos de Traballo, documento no que se recollerán fichas individualizadas e coas características de cada posto, tanto de persoal funcionariado como laboral e, de ser o caso, dos postos de nova creación que se propoñan tras o análise de necesidades. Nesta fase darase participación ao persoal.
Á terceira e última fase destinaranse os últimos 6 meses. Neste tempo realizarase a valoración dos postos de traballo, que será exposta á Mesa de Negociación. Posteriormente se elaborará un manual de xestión e valoración de postos de traballo e, a continuación se redactará a RPT propiamente dita. Isto permitirá reunir todas as fases a efectos de presentar o documento definitivo.
Ao non acadar os 60.000 euros de orzamento, e a efectos de axilizar o trámite, a licitación realízase mediante o método de invitación a tres empresas especializadas e con experiencia na redacción e posta en marcha de RPT e diferentes administracións.

Evitar discriminacións

O goberno socialista xa comunicara aos representantes sindicais presentes na Mesa de Negociación a intención de realizar unha RPT actualizada ao entender que o mellor xeito de valorar e atender as reivindicacións realizadas polos traballadores é facelo dende unha perspectiva xeral e de conxunto, evitando así discriminacións, xa que son moitas as demandas realizadas tanto a nivel colectivo (Policía Local, Auxiliares Administrativos, Protección Civil, Técnicos, Operarios de Obras...) como tamén individual.