CULTURA
Humanos, fadas e trasgos do bosque soben ao escenario do Auditorio coa comedia do “Soño dunha noite de verán” Vilagarcía de Arousa, 14 de febreiro de 2017.- En plena celebración de San Valentín, a temática amorosa sala esta fin de semana á escena cunha das obras de teatro máis soadas e características do xénero da comedia romántica. Trátase do clásico de William Shakespeare “Soño dunha noite de verán” que a compañía Voadora representa o sábado no Auditorio para facer pasar unha agradable e divertida velada cos amoríos e os desamores de humanos, o poder das fadas e as travesuras dalgún que outro trasgo. A entrada custa 5 euros.
14.02.2017.- Baixo a dirección de Marta Pazos, Voadora deseñou un espectáculo de gran formato de acorde coa grandeza do texto de Shakespeare. Nove actores compoñen o elenco desta comedia, engalanada cunha impresionante e coidada escenografía, decorados e vestiario. Os actores son Anäel Snoek, Andrea Quintana, Areta Bolado, Borja Fernández, Diego Anido, Hugo Torres, Janet Novas, Jose Díaz e Liza Suárez.
Sinopse
Demetrio e Lisandro queren a Hermia. Ela só ten ollos para Lisandro pero o pai dela só acepta a Demetrio. A súa amiga Helena ama a Demetrio pero este amor non é correspondido. Hermia e Lisandro acordan fuxir da cidade ao amparo da escuridade, pero son perseguidos por un enfurecido Demetrio que á súa vez é perseguido por unha extasiada Helena. No bosque, sen o coñecemento dos mortais, Oberón e Titania (rei e raíña das fadas) teñen unha disputa sobre un criado. A trama xira cando o súbdito de Oberón, Puck, corre solto cunha flor que fai que as persoas namoren do primeiro que vexan ao espertar.
Prezos simbólicos
Esta representación chega a Vilagarcía a través da programación da rede Galega de Teatros e Auditorios conveniada entre o Concello e a Agadic. O apoio institucional fai posible que espectáculos de primeiro nivel, de calidade contrastada e das mellores compañías de Galicia, cheguen ao público en xeral a prezos simbólicos.
De feito, a entrada para esta representación, igual que para todas as demais da Rede, costa 5 euros. As localidades pódense adquirir anticipadamente (máis gastos de xestión) a través de http://www.ticketea.com e do teléfono 902 044 226. Tame´n están dispoñibles o día da función na billeteira do Auditorio a partir das 19:00 horas.