FESTAS
SES protagonizará as Festas de Santa Rita cun concerto na Xunqueira o sábado 20 de maio A cantante SES actuará o 20 de maio en Vilagarcía no marco do programa das Festas de Santa Rita. Ofrecerá un concerto gratuíto no parque da Xunqueira contando como teloneiro co grupo Sanjurjo& Dopico, do cal forman parte varios músicos vilagarciáns. A Concellería de Cultura volve a apostar pola música galega e os grupos locais como prato forte das festas.
17.02.2017.- SES e a súa banda actuarán nas festas de Santa Rita dentro da xira de presentación do seu novo traballo, ‘Opoñerse á extinción’, un disco rebosante de enerxía composto por once temas que arrecenden á cantora bergantiñana en cada acorde.
‘Opoñerse á extinción’ é o cuarto álbum dunha SES que sigue sendo pura forza, inconformismo e paixón. Nel segue a liña do seu inconfundible estilo que a levou a converterse na artista máis relevante do país nos últimos anos e nun auténtico fenómeno social que non deixa de medrar.
O dúo teloneiro, Sanjurjo & Dopico está composto polo vilagarcián Manolo Dopico -que anteriormente participou en grupos como A Roda, Leixaprén ou Balakandra- e por Martín Sanmjurjo, natural de San Sadurniño e participante en proxectos como Sarabaixas e Balakandra.Para o concerto en Vilagarcía actuarán co formato de quinteto acompañados por Rubén Lamas (baixo), Alvaro Cardalda (acordeon e teclado) e Carlos Pedrosa (batería e percusión).