DESENVOLVEMENTO LOCAL
Fexdega acollerá en maio unha nova feira, dedicada ao fogar A Xunta de Goberno Local autorizou hoxe á empresa Klip, de Vilagarcía, a organización de dúas novas feiras no recinto feiral de Fexdega, unha delas novidosa no historial feiral local. Trátase de Expocasa, que se celebrará entre os días 13 e 17 de maio próximos, e terá que ver con todo o que rodea a construción e amoblamento dunha vivenda (cociña, baños, decoración, etcétera).
13.03.2017. A mesma empresa foi autorizada para desenvolver unha edición de Arousa Motor, con datas de celebración entre os días 28 e 30 do mesmo mes de maio.
Por outra banda, o goberno local decidiu solicitar unha subvención de algo máis de 200.000 euros dentro da convocatoria da Xunta de Galicia para a promoción de novas escolas obradoiro. Neste caso, o executivo que dirixe Alberto Varela opta á axuda máxima, prevista para 20 alumnos durante 9 meses de formación e traballo, divididos en dous módulos: un de carpintería e outro de calefacción, fontanería e rega.