URBANISMO
A Xerencia de Urbanismo propón volver expoñer ao público a modificación puntual relativa á finca dos Martices O Consello da Xerencia de Urbanismo aborda mañá a proposta dos técnicos municipais de volver a someter a información pública a Modificación Puntual do PXOM relativa á finca dos Martices. Aínda que o documento xa pasou este trámite legal tras a súa aprobación definitiva polo Pleno, posteriormente foron introducidas variacións conforme aos informes de Patrimonio, de aí a proposta de abrir un novo prazo de exame e presentación de alegacións.
28.03.2017.- A devandita Modificación Puntual non supón cambios substanciais respecto á actual situación recollida no Plan Xeral en vigor, pero si permitía que a propiedade dispuxera dos terreos precisos para levar a cabo a ampliación da factoría de Larsa e reordenar o resto da parcela. Ademais, establece un perímetro de protección para a antiga cheminea de Larsa, catalogada como ben a protexer como elemento representativo da arquitectura industrial. No marco da iniciativa tamén se recolle a cesión ao Concello da casa solariega e a capela sitas na finca, que pasan a ter a consideración de equipamentos públicos. Como consecuencia, a modificación reordena o resto dos terreos privados unha vez restados os equipamentos.
A variación que se ven de introducir é a relativa ao cómputo da edificabilidade no que, inicialmente, se tiña en conta á correspondente aos equipamentos públicos que se doan ao Concello, e que finalmente non se computan.
Pese a que os técnicos consideran que as modificación non son de “carácter substancial”, o que si obrigaría a realizar unha nova exposición ao público, a efectos de disipar dúbidas e en pro dunha total transparencia, aconsellan iniciar un novo proceso durante o prazo de 2 meses a contar unha vez que a medida sexa publicada en boletín oficial. En vista do resultado do primeiro trámite, que se saldou cunha única alegación, é de supoñer que o novo prazo non xere moitas máis. Rematado este trámite, a modificación deberá ser aprobada definitivamente polo Pleno para a súa incorporación ao PXOM.