VILAGARCIA DE AROUSA

CONCELLO
Medio Ambiente informará o mércores aos veciños de Rodrigo de Mendoza e A Florida sobre a compostaxe urbano
A concellería de Medio Ambiente convoca a todos os veciños do entorno do parque da Coca (Avenida Rodrigo de Mendoza e A Florida) a acudir o próximo mércores, 5 de abril, ás s esións informativas sobre a compostaxe urbana. A mestra composteira que dirixe e coordina o plan no Piñeiriño será a encargada de explicar o proceso e aclarar as dúbidas e suxestións que planteen os veciños, xa que a idea do Concello e estender o plan a esta outra zona de Vilagarcía.

29.03.2017.- As charlas celebraranse nun punto intermedio do parque, ao pé das escaleiras sitas a carón do parque Infantil da Coca. A charla matutina comezará ás 11 da mañá e haberá outra a partir das sete da tarde, co obxecto de que poida asistir un maior número de veciños. A partir de mañá, operarios municipais empezarán a colocar en todos os portais e locais da zona carteis anunciando as sesións.

O edil de Medio Ambiente espera contar coa colaboración e disposición dos veciños desta zona, en especial tendo como exemplo a positiva experiencia que está en marcha no Piñeiriño onde, despois dos lóxicos temores iniciais, os veciños xa comprobaron que o proceso ben realizado non xera nin cheiros nin ningunha molestia ou prexuízo. Pola contra, supón un xeito ecolóxico de reducir os residuos sólidos orgánicos que se xeran nas casas e de elaborar un abono natural do que dispoñen os veciños. Estas son as razóns polas que no Piñeiriño xa estean participando no plan o dobre de persoas das anotadas inicialmente e se tivera que instalar un segundo centro de compostaxe noutro punto do barrio.

O concelleiro de Medio Ambiente, Lino Mouriño, anima aos veciños do contorno da Coca a achegarse ata o Piñeiriño a comprobar por eles mesmos o funcionamento dos centros de compostaxe e percatarse en primeira persoa de que non producen cheiros nin molestias de ningún tipo.

Polo momento, e ata que non se celebren as sesións informativas do mércores, o Concello non continuará os traballos de acondicionamento das plataformas para instalar os composteiros comunitarios e cuxo emprazamento foi recomendado pola mestra composteira. A idea é colocar dúas liñas para dar servizo a ampla zona comprendida entre Rodrigo de Mendoza e A Florida, colocando unha no inicio do parque da Coca e outra na parte superior do mesmo, ao pé da beirarrúa da Rúa Florida. Dado que se trata dun parque fluvial, o Concello pediu a opinión de Augas de Galicia sobre o emprazamento dos composteiros.