XUVENTUDE
Xuventude ofrece formación en animación á lectura a monitores de tempo libre Coincidindo co mes dos libros, a Concellería de Xuventude pon en marcha un curso de animadores á lectura. A actividade está destinada a mozos e mozas de 18 a 35 anos, tendo preferencia os desempregados e aqueles que xa dispoñan do título de monitor de tempo libre. A asistencia ao curso é gratuíta e os interesados dispoñen ata o 7 de abril para inscribirse. A actividade formativa componse de 12 horas lectivas que inclúen parte teórica e práctica e desenvolverase do 19 ao 22 de abril en horario de tarde.
01.04.2017.- A Concellería que dirixe Sonia Outón ofrece esta nova actividade no marco da súa liña de formación para a mocidade. No caso deste curso de Animador á Lectura, aínda que aberto a todo o público, oriéntao especialmente a un sector laboral bastante demandado polas administracións públicas, como é o da animación en tempo libre, concretando por vez primeira no campo da animación á lectura.
O obxectivo do curso que se pretende con este proxecto é dar a coñecer as técnicas e estratexias a utilizar na Educación para que a lectura se converta en algo pracenteiro e interesante para os alumnos e alumnas. Os contidos que se abordarán na actividade van dende a labor familiar e docente de cara a animación á lectura, a selección de libros para atraer aos rapaces, as normas xerais para animalos a ler, e xa, dun xeito máis concreto, a animar a ler dende a propia lectura, dende a escritura, dende a oralidade e dende outros xeitos de expresión.
Os interesados en participar nesta actividade deben inscribirse presentado cuberto o formulario dispoñible no taboleiro de anuncios da web municipal e entregalo no Rexistro Xeral do Concello. O prazo remata o día 7 de abril a lista de admitidos publicarase o día 12.