CONCELLO
Os responsables da Policía Local e Nacional constatan o baixo nivel de delincuencia na cidade O alcalde Vilagarcía, Alberto Varela, reuniu onte no Concello aos máximos responsables da Policía Local e Nacional de Vilagarcía a efectos de avaliar conxuntamente as últimas incidencias rexistradas, avaliar a situación real no municipio e avanzar as liñas de actuación conxunta de cara á temporada de verán. Tanto a Xefa do servizo municipal como o comisario coincidiron ao destacar o baixo nivel de conflitividade existente en Vilagarcía, impresión que a Policía nacional constatou con cifras obxectivas que demostran que descenderon as ratios de delitos.
06.04.2017.- As estatísticas policiais poñen de manifesto a situación real que se vive en Vilagarcía,e que en ocasión vese distorsionada por incidentes puntuais, como o acontecido hai uns días na Praza de España, que fan que o nivel de seguridade ou conflitividade que perciben as persoas non se corresponda coa realidade. Ademais, dase a circunstancia de que os incidentes que se rexistran están protagonizados por un número por reducido de individuos reincidentes e coñecidos tanto pola poboación como polas forzas de orde e que, nalgún caso, hai que abordar de forma conxunta cos Servizos Sociais municipais e autonómicos. Precisamente na xuntanza tamén se testou a fluidez e coordinación dos corpos policiais cos Servizos Sociais do Concello.
Outro dos puntos abordados na reunión de onte foi o relativo á preparación da campaña de cara á temporada de verán, na que Vilagarcía rexistra un importante incremento da poboación, o que xera máis necesidade dos servizos policiais. Xunto co alcalde, os responsables das policías sentaron as bases para coordinar as actuacións de verán.