EMPREGO
Promoción Económica pon en marcha unha nova edición das axudas municipais para a creación de empresas A Área de Promoción Económica do Concello de Vilagarcía pon en marcha unha nova edición das Axudas Municipais para a Creación de Empresas ás que este ano destina unha partida de 46.000 euros, 4.000 máis que o an o anterior. A Xunta Local de Goberno aprobou as bases que rexen a convocatoria cuxo prazo de solicitude se abrirá tras a publicación das mesmas no BOP. Estas axudas a fondo perdido concédense para a creación de novos negocios e poden acadar un máximo de 2.000 euros.
15.04.2017.- O programa de Axudas á Creación de Empresas é unha iniciativa do Concello de Vilagarcía que ten como obxectivo colaborar de forma activa na xeración de emprego no municipio apoiando a posta en marcha de novos proxectos empresariais. O departamento que dirixe Juan Antonio Pérez Callón decidiu incrementar este ano a partida para poder chegar a maior número de emprendedores.
No anterior exercicio recibiron as axudas a fondo perdido 21 iniciativas de nova creación entre as que se repartiron 40.000 euros. As axudas oscilaron entre 761 e os 2.000 euros e contribuíron á apertura e a conseguinte creación de emprego de varios establecementos de hostalería, perruquerías e centros de estética, unha academia de corte, un lavado de coches, unha zapatería, unha tenda de conxelados, unha inmobiliaria, unha clínica podolóxica, unha franquicia de seguros médicos e unha empresa de transportes.
Poderán acollerse a este programa os negocios que se enmarquen no apartado de PEME, con sede fiscal e social en Vilagarcía e que inicien a súa actividade empresarial entre o 2 de decembro de 2016 e o 1 de outubro de 2017.
A finalidade das axudas é e contribuír a financiar os gastos extraordinarios que xera a constitución e posta en marcha da empresa, así como gastos de aluguer, vehículo industrial, aplicacións informáticas, primas e seguros, gastos correntes e ata dereitos de propiedade intelectual. Por iso serán subvencionables, os gastos realizados ata dous meses antes do inicio da actividade.
As axudas tramitaranse en réxime de concorrencia non competitiva e son compatibles con calquera outra axuda ou subvención concedida por empresas públicas ou privadas sempre que o importe total das mesmas non supere o custo dos gastos.