VILAGARCIA DE AROUSA

XUVENTUDE
O Lectoriño comeza coa homenaxe a Carlos Casares e a súa colección de “Principiños”
A Concellería de Xuventude abre mañá os actos do Lectoriño 2017 coa primeira homenaxe a Carlos Casares, autor ao que se dedica este ano o Día das Letras Galegas. O recoñecemento ven a través da exposición da gran colección propia que o autor tiña de edicións da obra de Sain-Exupéry, “O Principiño” publicadas en diversos idiomas e dialectos do mundo. A mostra que leva por título “O Principiño ao redor do mundo” inaugúrase mañá ás 20:00 horas na sala de exposición do Auditorio e poderá visitarse ata o día 28 de abril.

17.04.2017.- A colección privada de Casares chega a Vilagarcía a través da súa Fundación. Tratase dunha mostra didáctica para público miúdo e adulto que recolle máis de 100 edicións do libro de Saint–Exupéry en máis de 60 idiomas e dialectos do mundo. Carlos Casares comezou a coleccionar exemplares desta obra a principios da década dos 70 coincidindo co seu traballo de tradución da mesma ao galego para a editorial Galaxia. A fascinación que sentiu polo texto de contido filosófico e poético animouno a facerse con exemplares en diversos idiomas e edicións especiais. No momento da súa morte,O escritor contaba con máis de 100 volumes en linguas xermánicas, eslavas, románicas, escandinavas e mesmo orientais, ademais das propias da península Ibérica: galego, castelán, portugués, vasco e catalán, xunto con dialectos como o aragonés, asturiano ou estremeño. Tamén conta con edicións únicas ou raras de linguas minoritarias que se exporán estes días no Auditorio.

O Principiño (Le Petit Prince) publicada en 1943, a novela máis famosa do aviador francés Antoine de Saint-Exupéry, é un conto filosófico cunha enorme carga poética que, baixo a aparencia dun conto infantil, aborda temas profundos como a vida e o amor, a morte, a amizade, as actitudes e as preocupacións da vida. Foi ilustrada polo propio autor e traducida a 180 linguas e dialectos (en máis de 500 edicións), levando vendidas máis de 80 millóns de copias por todo o mundo.