VILAGARCIA DE AROUSA

CULTURA
O Vilablues se celebrará os días 7, 8 e 9 xullo, e anuncia a presenza de Angela Brown no seu cartel
Co obxectivo de alongar o calendario cultural do verán, a organización do VILABLUES Festival e o Concello de Vilagarcía de Arousa veñen de fixar as datas para a celebración da II Edición do Festival de Blues de Vilagarcía. O evento adiántase aos días 7, 8 e 9 de xullo de cara a entrar no calendario estatal de festivais deste xénero.

24.04.2017. Na súa primeira edición, o VILABLUES convocou a máis de 5.000 persoas nos tres días de concertos, obtendo grandes críticas nos medios especializados e unha notable repercusión do evento, acadando un cen por cen na ocupación hostaleira.

Seguindo a liña dunha promoción turística de calidade, o festival aspira a ser un elemento dinamizador na economía da zona e continuará co esquema do ano pasado de tres días de concertos, con escenarios espallados polas rúas de Vilagarcía.

O Festival continúa co seu carácter gratuíto, sendo sen dúbida unha das grandes apostas do Concello de Vilagarcía para a súa programación cultural do verán.

A primeira confirmación é ANGELA BROWN, unha “blues diva, ronca, sensual e explosiva", como foi definida. Nada en Chicago, Illinois, Ángela Brown comezou a súa carreira musical cantando música gospel en igrexas e escolas. Alí, no instituto, propuxéronlle o papel principal interpretando a Gertrude "Ma" Rainey, no musical "Bessie Smith", co que comezou a súa carreira profesional.

No 1980 foi membro da Erwin Helfer & The Chicago All Stars, e foi nunha xira durante 1982 cando o público europeo a escoitou por primeira vez. Actuando nos míticos clubes de Chicago compartiu escenario con colegas e amigos como Blind John Davis, Pinetop Perkins , BB King, Georgie Fame ou long John Baldry.

É coñecida como a “Bessie Smith dos 80“. A súa poderosa voz adáptase ao blues máis moderno, converténdose nunha gran atracción nos festivais que se celebran por todo o mundo, non só pola súa voz senón tamén pola súa presenza no escenario, con esa gran forza e sensualidade que a caracterizan.

Angela Brown aparece no Libro Guinness dos Récords con “Who's Who of Blues” , e na nova Virgin's Encyclopedia of the Blues. No ano 1999 foi galardoada en Francia como “artista do ano”, e no Reino Unido ese mesmo ano como mellor interprete feminina. No ano 2000, coa súa banda inglesa 45,s Los Mighty, acadou o recoñecemento de segundo mellor álbum do ano. No 2004 rexistra Wins of Blues, disco imprescindible na súa carreira.

A partir do momento no que fai de Europa a súa casa, a súa carreira comeza a dispararse cunha longa lista de concertos en clubes e festivais de alto nivel como Monteux Jazz Festival, North Sea Jazz Festival ou Ascona Jazz Festival. Angela continúa a ser unha artista moi solicitada para colaboracións en discos con diversos artistas norteamericanos.

CONSULTA AQUÍ O DOSSIER COMPLETO DO VILABLUES 2017:

Descargar PDF